政情：愛女遊日范太嚇餐飽
日本福島核危機輻射擴散，好多喺日本嘅港人都急急趕返香港。原來全國人大常委范徐麗泰千金范凌華（Stephanie）喺地震期間去咗北海道旅行，前日先至安全返港。
話說喺地震發生後，范太為搵愛女心急如焚，點知囡囡個電話又打唔通，搞到范太呢個廿四孝媽媽擔心到不得了。
范太尋日出席香港友好協進會嘅活動時，講開日本地震都不得不提佢愛女Stephanie遊日嘅遭遇，佢話初時搵唔到個女都好擔心，但Stephanie向來好有交帶，諗到媽咪會擔心，所以主動寫咗個電郵返香港報平安，范太一睇到立即放心晒，總算有驚無險啦！
其實北海道並無受今次地震或海嘯影響，照計Stephanie好安全，但隨後又發生核電廠爆炸洩漏輻射，范太做得媽咪一定擔心子女安全嘅，始終返到香港才安心，而范太亦話短期內都唔打算再去日本喎！