政情:沈祖堯緬懷小童群益會
大家最懷念童年啲乜嘢？中大校長沈祖堯就最掛住跳飛機同兒童期刊《兒童樂園》。今年係小童群益會七十五周年會慶，尋日佢哋喺中央圖書館搞咗個經典兒童玩具展，沈校長係主禮嘉賓，仲自爆話由細喺小童群益會玩到大，特別掛住細細個玩嘅玩具，例如荷蘭水蓋同拍公仔紙等，不過佢話從來都唔會玩丫叉彈紙，因為好易整傷人，只係曳曳嘅小朋友先會玩。
沈校長話細個喺灣仔住小童群益會附近，每日放學都會去小童群益會玩一、兩個鐘，佢最鍾意同一班朋友仔玩跳飛機、康樂棋等嘅群體遊戲，有時仲會玩到樂而忘返，天黑先急急腳飛奔返屋企，搞到媽媽要喺街度等佢。但好彩嘅係，沈校長由細到大功課都頂呱呱，所以就算一次半次玩過龍都冇畀人鬧。
對於現今小朋友物質富裕但唔多識處理人際關係，沈校長就好感慨，佢話細個嘅時候雖然冇乜玩具，但成日都可以一大班人一齊玩，所以窮都好開心，沈校長成日都鼓勵囡囡多啲出去同朋友玩，唔好淨係死讀書喎。