中環出更：陳慧慧躋身港安慈善基金
有「棉紗大王」稱號嘅南豐集團創辦人陳廷驊次女陳慧慧（Vivien），雖然捲入家族爭產糾紛，但絲毫冇阻佢做善事嘅心情。
現任南豐主席及董事總經理嘅Vivien，最近躋身港安醫院慈善基金會理事會成員。
Vivien未獲委任港安基金會之前，佢一直透過已有四十一年歷史嘅陳廷驊基金會做善事，長時間與爸爸並肩處理基金會嘅工作，所以爸爸退休後，佢就接任基金會主席至今。
醫治中港貧童
多年前，陳廷驊基金首次捐贈五萬元畀港安慈善基金，以供購買醫療用品協助貧困兒童之用。此後兩個基金緊密合作，至今陳廷驊基金累計捐畀港安嘅款項已超過七百五十萬元。今次Vivien更入埋理事會做基金理事添！
港安醫院慈善基金專門為內地及香港有經濟困難嘅病童提供醫療治理，最近啱啱將服務範圍擴大至尼泊爾，惠及當地患有聽力障礙嘅患者，認真係愛心無國界嘅典範。
卓妮