中環出更：朱繼陶拍賣名錶好友齊捧場
朱繼陶連任香港鐘錶業總會主席，日前商會舉行慈善晚宴暨董事會就職典禮，唔少到賀嘉賓都話係慕「朱」之名而來，咁多老友，難怪晚宴嘅慈善拍賣，卓妮都感受到一呼百應嘅威力啦。朱主席話籌款係為咗佢哋總會喺稍後成立嘅慈善基金而設，善款會用嚟扶貧同培訓新人，好有意義。
今次行家之間嘅拍賣，件件都係精品，好似香港鐘錶業總會顧問梁青華，佢用咗四萬蚊就投得一隻六十年代出產嘅絕版TAG Heuer豪華錶，呢隻包金設計嘅絕版手錶，夠晒vintage型格。梁青華係識貨之人，當然愛不釋手，佢仲同卓妮話隻錶好超值，不過佢唔獨食，隻錶打算等第日再有慈善拍賣就會再捐出嚟，發揮佢嘅慈善價值，絕對係貨如輪轉。
林建康借花敬「妻」
另外一件同樣令人不得不投嘅仲有勞力士金鋼潛水錶，呢隻鑲咗八粒鑽石同三粒藍寶石嘅絕版潛水錶，米蘭站營運總監姚君偉兩次出價先至可以十萬蚊投得。不過壓軸由太子珠寶鐘錶捐出、鑲有百幾粒鑽石、重三卡嘅十八K白金女裝腕錶叫價就更熱烈，最後由已故富商林百欣養子林建康嘅太太以廿二萬投得，成為全場最貴嘅拍賣品，不過林建康話買錶唔係淨係為咗氹老婆，佢細細聲同卓妮講係要撐老友朱繼陶。
大家樂主席陳裕光亦同太太一齊嚟，卓妮問佢嚟撐邊個佢即時語塞，原來係幽默就真，佢話以為卓妮係問撐邊個做特首，所以唔敢亂答，當然佢嘅出現，都係因為朱主席啦。
同場嘅金銀業貿易場理事長張德熙，就係副主席區宇凡嘅大學同學，兩人老友鬼鬼，連區副主席兩個囡囡見到張Uncle都好好傾。咁啱工業總會副主席劉展灝路過，見到張德熙都同卓妮介紹對方係「金王」，睇嚟張生都係吃得開之人。
卓妮