中環耳目:施榮懷掃「會酒」宴客助興

中華廠商聯合會下屆會長爭奪戰愈趨激烈,自從副會長施榮懷(Irons)證實會競逐會長後,外界都好關注事態發展,卓妮自然金晴火眼到實。最近有消息話,Irons大手筆訂購五十箱廠商會去年推出嘅會酒,呢隻酒係○七年出品嘅法國靚紅酒,睇嚟佢對廠商會好有歸屬感喎,莫非想用誠意拉票?

卓妮搵Irons求證,佢笑笑口承認,話早排飲咗呢隻會酒之後,覺得口感好好,所以一口氣訂購五十箱,用來請客或同班政商界兄弟聚會時享用。講番呢隻廠商會會酒原來有段古,話說廠商會高層經常要宴客及聯誼,所以經常買酒助興,普遍會董都識飲識食,通常自備靚酒與眾同樂。

貼廠商會標籤

有次班會董聚會期間,就發現呢隻法國紅酒好正,於是決定同經銷商大批訂購然後加工貼上廠商會標籤,變身成為自家品牌嘅靚紅酒,但附帶條件係只限於會員自用、宴客或送禮。唔知情嘅人,仲以為廠商會買咗酒莊,做埋紅酒生意添!

卓妮

Money18新功能「18好路數」為你預測心水股票升跌機會率