政情：陳啟宗叫80後出外掘金
八十後怨氣多，怨無機會上車買樓，做工晉升機會又細。恒隆地產主席陳啟宗（Ronnie）話，其實香港發展成熟，機會當然比幾十年前少啦，不過只要肯走出去，就會發現遍地黃金。
陳南祿由太古跳槽去恒隆做董事總經理大半年，新猷之一係建議Ronnie同傳媒見見面，聽聽意見，於是佢從善如流。其實最多意見當然係Ronnie自己，佢主動打開話匣子，話八十後成日怨冇機會，「冇錯，我同陳南祿後生時的確有好多機會，不過依家嘅青年，其實機會仲多好多倍。」佢話青年入內地做工，機會自然多，好似佢今年廿八歲嘅兒子咁，就喺五年前去咗上海，當時月薪一萬零三百蚊，自此就自食其力，老父冇再提供任何財政上嘅支援。
對於應否復建居屋，不時同特區政府抬槓嘅Ronnie話，如果過去十年土地供應做得好，就不必重推居屋，但以現時情況，都好難走得甩。至於唔少呼聲要官員落台，佢認為個別官員落台唔緊要，但全體落台就對大局唔好。咁邊啲個別官員要落台，佢就無講嘞。