中環出更：「FLASH Outline彩妝展」政商名人個個讚靚

展覽由東方報業集團旗下潮流雜誌《Flash ON weekly》舉辦，希望透過攝影，將藝術和美容兩者結合。尋日英皇集團主席楊受成同埋細仔楊政龍（Alex）父子兵出動，楊生一入場就笑意盈盈，猛話：「好靚！」仲話依家啲年輕人鍾意咁時尚、摩登嘅嘢，形容呢種形式嘅展覽係破天荒添！期間佢又閱讀現場展示嘅《Flash ON weekly》周刊，當佢揭到靚錶時，即刻睜大雙眼睇真啲，楊生果然係愛錶之人。

Alex大讚啲相影得好好

Alex就話，以前喺美國讀書時，經常去行博物館，又會同設計師學吓師，返港之後工作忙碌，就少啲機會欣賞藝術嘞！今趟佢大飽眼福，仲盛讚《Flash ON weekly》啲相影得好靚，同爸爸英雄所見略同。

楊受成（左）翻閱圖片精美嘅《Flash ON weekly》，本集團高層向佢介紹雜誌內容。 （霍振鋒攝）

劉鳴煒覺得今次展覽係用心去做。

將The ONE商場搞到有聲有色嘅華置副主席劉鳴煒，百忙之中都要嚟體驗吓藝術之美。佢謙稱唔識化妝，不過今次彩妝藝術互動展嘅展品做得好好，同佢搞商場嘅心得一樣，就係用心去做。佢最近好忙，事關由佢發起嘅香港精神大使選舉又到提名期。佢咁用心去支持公益，都係好寶貴嘅香港精神喎！

李妮大讚彩妝展覽富啟發性，激發佢嘗試更大膽的化妝。 （徐家浩攝）	何倍倩身為護膚品牌老闆，對化妝扮靚資訊特別着迷。	陳細潔話，唔少女士出街連妝也懶得化，但佢認為化妝係一種禮貌。

城中型女保良局總理「鯊魚女」陳細潔，知道時代廣場有彩妝展，放工後專登去湊熱鬧，佢大讚妝容大膽有創意，多幅作品叫人一見難忘，大大喚醒港人要注重化妝，提升個人形象。已故恒生銀行創辦人何善衡孫新抱何倍倩（Anina）本身係護膚品牌老闆，潮流觸覺敏銳，佢自爆係《Flash ON weekly》忠實擁躉，經常睇到入晒神，又讚展品充滿驚喜，展現創作嘅團體精神。博愛醫院總理李妮（Lily）亦嚟睇展覽，美妝在前，令佢亦如塗上彩妝般興奮。