政情：梁栢賢上前線撲怒火

梁醫生尋日出席香港醫學博物館舉辦嘅籌款步行活動時，仲畀主禮嘉賓之一嘅發展局局長林鄭月娥揶揄，指在場有唔少醫生組織代表出席，反映醫學界相當齊心，仲話醫生最近組織起上嚟真係唔嘢小，搞到梁栢賢呢排好頭痛。梁醫生聽到呢番話後，當場非常尷尬。

為咗平息前線怒火，梁醫生決定膽粗粗，呢個星期落醫院睇前線醫生晚上值班嘅情況。本身係澳洲醫科畢業嘅梁栢賢，一九八五年加入港府後，喺衞生署同醫管局只負責統籌及管理嘅工作，無做過臨床職務。佢尋日同記者講，自己並無臨床經驗，所以唔敢貿然去前線分擔工作，只係去視察吓實際情況，了解前線員工有幾辛酸，佢叫大家唔好誤會佢會落手落腳，費事嚇壞前線醫生同病人。