中環出更：食力簡：六千蚊只係Panadol
財爺後知後覺，宣布人人派錢六千元，可惜民心盡失，市民袋錢也難消怨氣。冠軍級練馬師簡炳墀（食力簡）都睇唔過眼，怒轟派六千元係止痛藥，藥力過後，市民照樣再痛過。
食力簡鞭策政府向來唔手軟，卓妮尋日喺沙田馬場見到佢，講起「六千蚊」，簡Sir就無名火起：「無用嘅，係Panadol嚟啫。」佢批評政府施政欠遠見：「應該將錢投放喺基建同教育，起多啲居屋同公屋，社會自然少啲怨氣。」簡Sir話，年輕一代置業安居冇望，係迫切需要幫助嘅一群，但政府一味派錢，治標唔治本，抵鬧。雖然嬲政府，但食力簡係義氣之人，拍心口將六千蚊捐出嚟幫助貧苦大眾。
高永文未袋錢先捐突
保良局副主席鄭錦鐘（Eric）、富豪邱德根同防癌會主席高永文都加入善長行列，捐款金額更有多無少。Eric話，平日捐款金額早已遠超六千元呢個數目，就算政府唔派錢，一樣照捐，但佢擔心港府咁派錢法，一旦難以持續，反而令市民失望喎。
防癌會主席高永文尋日出席港大醫學博物館籌款活動時透露，自己未袋錢已先捐錢，各捐六千元畀防癌會及紅十字會，共捐一萬二千元，認真唔話得。
講番馬場戰況，莎莎老闆郭少明匹「締造美麗」再交出漂亮成績。郭生專登着紫色西裝增強旺氣，配埋一條紫黑色Gucci呔，果然紫氣東來，「締造美麗」喺第八場以神勇姿態奪冠，袋三百四十二萬元頭馬獎金，仲贏得出戰資格，本月十五日出發往杜拜參加賽事，可謂雙喜臨門，難怪郭太及千金郭詩慧喜極擁抱，且看「締造美麗」能否代表香港爭光嘞！
卓妮