煲呔曾和鬍鬚曾這對沙煲兄弟，還是做大佬的經驗老到，深諳抽水食住上之道，一個神來之筆，將「人人有份六千蚊」的政治效應消失於無形，不讓細佬專美，自己升呢「捨身救弟」真英雄。
四面楚歌的鬍鬚曾，改弦易轍下跪認衰已成定局，新聞價值只剩擲多少真金白銀化解危機而已。相比之下，「煲呔曾夜赴瑪麗睇急症」，必定更有看頭。做戲不妨做足全套，如果將「睇急症」變成「輪急症」，在醫院非緊急病人輪候區坐通宵，與民同「岳」，報紙A1頭條還輪到鬍鬚曾上？
其實，煲呔曾還有個絕好機會抽細佬水，只可惜錯過了。他大可以在抗議人士發動「暴力襲擊」前先發制人，接過粟米斑塊飯，先嚼兩啖後，以常客口脗說：「一吃就知是深水埗X記茶餐廳出品，廿八蚊盒送汽水。」再叫隨從付足便當錢，對方肯定當場嚇暈，哪裏還有「批㬹」的機會？
鬍鬚曾這次虧大了，依大佬一貫理財思路弄了個「超廢」預算案，自己被射成箭豬，煲呔曾躲在一邊裝傻，屁都不放一個。四百億加碼派糖方案宣布在即，眼看好戲快開場，甩難有望，卻被大佬半夜截胡，以胸口一個「十公分紅印」代價，撈足「代細佬受難」的政治本錢。
不過，這可是個危險訊號，老董幹了七年腳開始痛，煲呔曾接手不到七年心口痛，還有七百萬港人見證，難道又是提早下台的訊號？既然煲呔曾擺明天天等退休，求仁得仁，豈不妙哉？