政情：周松崗臨別省靚港鐵
將於年底退休離任嘅港鐵行政總裁周松崗，除近期幫港鐵拍廣告飾演「站長」推銷南港島線外，尋日更喺港鐵上年業績發布會上，落力為港鐵省靚招牌，睇嚟佢要做港鐵嘅最佳推銷員，做到退休前最後一分鐘。
周松崗尋日發布佢任內最後一份港鐵年度業績報告，佢如常地精神爽利，當被問到港鐵一旦加價，會否提供乘車優惠時，佢即刻滾瓜爛熟咁背出早已準備好嘅「台詞」，佢一輪嘴咁，話港鐵不時檢討票價優惠，提供啲優惠更係無一間公司可以做到。至於提到列車經常發生故障，雖然佢話希望乘客體諒，但又話目前港鐵能做到每一千班車，可能只有一班車延誤超過五分鐘，已屬全球最佳。
至於幾時招聘到接班人，周松崗就話未有咁快，相信未來一、兩個月都未有消息公布。唔知接班人嘅條件，會否包括要喺星期日巡視各個港鐵站，如果見到地上有垃圾，諗都唔使諗就要將佢徒手執起嚟呢？因為周松崗身體力行，就係咁樣做。