政情：肥亨赴京接農行任命
中策集團主席馬時亨○八年因病離開政府之後，只係打幾份散工，閒時約老友打吓高爾夫球、玩吓健身、品嘗美酒佳餚，不知幾快活。不過，肥亨貴為財經界猛人，無理由嘥咗一身好本領，所以佢最近又再接受新挑戰，獲委任為農業銀行獨立非執行董事。肥亨日前就啟程飛上京參加農行會議，並正式接受任命，仲約會好友食飯敍舊。
肥亨上京期間，咁啱撞正人大、政協兩會開鑼，肥亨可謂處處都撞到老友，真係約都無咁啱，所以佢繼續留喺北京，等啲老友得閒就一齊去食飯傾偈，估唔到平時大家喺香港各有各忙，難得個個都身處北京，話咁易就約齊腳。講開又講，京城依家滴水不漏，班人大政協老友唔係住北京飯店，就係住貴賓樓，肥亨就入住商務酒店，但相信搵個地方見面唔係難事。