中環出更：黃英豪購物網送名人飯局
網民力量不能小覷，其購買力同樣驚人，金至尊主席黃英豪及全國青聯常委吳傑莊（Johnny）睇準時機，最近齊齊打造網上購物平台「淘至尊」。雖然現時網上商店多不勝數，但佢哋好有信心，除咗獨家出售姊妹店金至尊及La Milky Way首飾外，仲有名牌手袋、美容護膚品、和牛美食、名貴紅酒、特色旅行團、演唱會門票等，貨品應有盡有，而且做到品質保證。
揼過千萬元宣傳
Johnny話，佢哋仲會同過百中外名人紅星合作開設網店，除咗有靚相同網誌之外，仲會有紅星設計嘅商品或用過嘅二手衣飾畀Fans購買。嚟緊佢哋仲會大搞過千萬宣傳，唔單止送名貴禮物，會員仲有機會同名人紅星一齊食飯或者出席電影首映禮，相信對於追星族嚟講絕對非常吸引。「淘至尊」涉及咁多範疇，難怪Johnny話個網由籌備到面世，足足用咗九個月時間，真係開間真舖都得。