政情:黑英轟港府衰過97前

教育局早前唔畀英皇書院校管會就減班議題進行表決,「霸王硬上弓」迫令減班,激起英皇校友不滿。一直為母校抱不平、不惜多次公開同港府打對台嘅前天文台台長林超英(黑英),尋日又再喺網誌發功,話本港喺九七後明明可以自己當家作主,偏偏教育局喺縮班事件上卻「將社會推向倒退,比回歸前更糟」,即係仲衰過殖民地政府。

違反「自願」減班政策

黑英話,教育局當初推縮班計劃時,強調係讓學校「自願」決定、當局只會「鼓勵」學校參與,而佢哋今次指令英皇縮班,明顯係違反自己向公眾宣布嘅「自願」減班政策,要求當局重新安排畀該校嘅校管會喺冇壓力嘅氣氛下,就減班一事作出表決,「將出了軌的政策執行拉回正軌」。

黑英又直言,本港喺回歸後終於可以脫離殖民統治,自己當家作主,大家應該一齊以持守誠信同以大眾利益為依歸做事至係,但英皇縮班一事發展成咁,反映某啲人已將社會搞到比回歸前更衰嘅情況。教育局今次咁唔按本子辦事,又難怪黑英咁感嘆嘅。

Money18新功能「18好路數」為你預測心水股票升跌機會率