政情：棠哥手術成功出院
本報上星期五報道，工聯會會長鄭耀棠決定長痛不如短痛，為頸椎移位病患入瑪麗醫院開刀做手術，手術成功。經過一個星期休養，工聯會尋日主動發新聞稿報喜，指棠哥康復進度快速，原先手腳麻痹乏力嘅感覺已消失，尋日出院，回家休養。
工聯會新聞稿話，棠哥今次手術由瑪麗醫院脊骨外科權威、港大創傷及矯形外科學系主任陸瓞驥操刀，手術進行咗五個小時，大病初愈嘅棠哥現時身體狀況良好，胃口好轉，手腳活動自如。新聞稿引述棠哥指，多謝瑪麗醫院醫護團隊用心治療同照料，感謝各界關心：「我會調養好身體，盡快重投工作。」咁正經嚴肅嘅語氣，完全唔似平日風格調皮反斗嘅棠哥。
休養勢缺席兩會
新聞稿又話，棠哥未來一段日子仍需要喺屋企休養，事關神經線因長期受壓，手術後仍要進行跟進治療，咁即係話，身兼港區全國人大代表嘅棠哥，肯定要向下個星期召開嘅北京人大、政協「兩會」「告假」。