中環出更：蒙德揚榮升馬主代父圓願
多年來贊助馬會舉行樂聲盃嘅已故「電器大王」蒙民偉，原來一直無馬主運，過去先後兩次入紙競投馬匹都落選，佢嘅愛兒、信興集團副主席蒙德揚（David）去年代父上陣，同幾個業務上嘅好兄弟拍檔以團體名義入紙投馬，結果一擊即中成功中籤，榮升馬主之餘，仲圓父親嘅馬主心願。
David話，蒙叔在生時好鍾意動物，一直好想訓練出一匹駿馬良駒，無奈無乜馬主運，所以佢好想圓父心願，為咗練好匹馬，佢由馬匹、馬房到練馬師都經過精挑細選，遇上難題就請教朋友。至於馬名改乜，David梗係希望個名同電器有關啦，但話晒呢隻都係團體馬，佢話點都會同班兄弟商量吓嘅。
賽馬團體改名「旋風」
不過，團體名一早就定咗，原本取名佢哋電器業界每年春秋兩季舉行嘅大型營銷會名稱「大旋風」，但因為呢個馬名一早有人用咗，所以就簡單啲改做「旋風」賽馬團體。David有信心練好匹馬外，亦落力自我鞭策，一方面搞好公司業務，同時持續個人跑馬拉松嘅興趣，公餘不斷練跑，期望跑出好成績。