中環出更：李文斌滿腹大計 待掌仁濟
仁濟醫院董事局四月換屆，身兼第一副主席嘅理文集團主席李運強細仔李文斌（Edmond），將接替董吳玲玲出任主席。Edmond未上場已滿腹大計，尋日邀請咗懲教署長單日堅出席仁濟新春團拜，透露四月上場後會同懲教署合作成立一個「明日更生基金」，協助釋囚適應社會生活；又會成立基金，津貼嚴重殘疾人士聘請看護。
Edmond為慈善咁落力，難怪上天賜佢一對龍鳳胎，對孖生仔女眨眼已有八個月大，精乖伶俐。卓妮問Edmond有冇打算追多幾個，佢同太太耍手擰頭話，「兩個已經夠晒數」，十足幫家計會賣廣告。
Edmond太太仲透露，老爺同奶奶已首肯佢「收爐」，因為大哥李文俊已有三個小朋友，足以繼香燈。
王忠秣家有囍事
李運強一家兒孫滿堂，前仁濟醫院主席、王氏國際集團主席王忠秣亦有喜「訊」，佢愛兒王賢訊鐵定四月九日結婚，咁啱仁濟董事局喺四月八日舉行換屆就職禮，真係夾都無咁啱。
結婚咁大件事，團拜上好多世叔伯都恭喜王賢訊，叫世姪練好酒量。王賢訊同卓妮講，今年結婚係首要任務，其他大計要放埋一邊。
行會成員梁智鴻、華懋慈善基金主席龔仁心胞姊龔中心及胞妹龔因心現身撐場。團拜上發生咗件趣事，梁智鴻手執金刀切燒豬，變成真正嘅「金刀梁」。