高官政客要深入群眾，才可建立親民形象係人都知。然而，特區領導班子，由煲呔曾至一眾問責高官卻最怕百姓，新年逛花市，出來吃碗麵都要繞道而行，保鏢貼身，即使迫不得已落區做騷，都閃閃縮縮，好似做賊咁。如此不善於溝通，應該冇咗份工而唔係做好份工！
美國社交焦慮症協會指出，全球約有百分之七的人患有社交焦慮障礙症，平均每一百人中有十三人在一生中有發病機會；而在中國，社交焦慮也是個無法迴避的心理問題，一個保守估算，每十個人中就有一人或多或少遭遇社交障礙的困擾。
國人怕陌生人的社交障礙，有許多歷史因素，遠的如自鴉片戰爭後我們便一直割地賠款，人民長期在不平等及屈辱下過活，這種心理創傷的直接影響是人際關係扭曲、緊張及異化；近的如「反右」及「文革」，學生打老師、夫妻互鬥、兒子告老子等慘劇，人們被迫要「懷疑一切」。學者指這主要是信任結構出了問題，尤其是公權力的信任崩潰，朋友、熟人都不敢隨便相信，更何況還有「街坊組長」全天候監視，人們噤若寒蟬是可以理喻的。
香港並非那樣的社會，特區一眾高官卻有嚴重內傾人格特徵，怕見陌生人，究竟他們恐懼甚麼？口口聲聲「執政為民」而怕面對百姓，難道以為關起門做大官，避世就可以逃過監察，少說話多瞓覺，發多啲南柯一夢，好快就混完任期？
當然，一眾高官乏社交能力，開口夾着脷，亂噏無謂，一係官威亂發，一係擺款教訓「八十後」，一係讓歪理飛，死剩把口，咁嘅情況下，民望唔大跌至奇！