政情：黃成智寸鐵頭仁肥矮
咪睇民主黨立法會議員黃成智身形中等，其實佢嘅腰圍一啲都唔幼，尋日仲自爆，話自己嘅腰圍比起黨主席何俊仁仲要粗，只不過對方喺比例上睇落較肥，新年流流明寸鐵頭仁矮，認真大膽。由於腰圍日粗，黃成智喺兔年伊始已經畀老婆大人迫令減肥，依家每日佢都食得好清淡。
無他嘅，原來黃成智身體好多指標已達臨界點，好似血糖同膽固醇咁，難怪老婆唔畀佢放任食嘢啦。
佢話自從開始節食後，一盒朱古力食一半就畀人拎走，飲咖啡要用代糖，每朝早餐只可以食麥皮加乾果，老婆近日連乾果都唔畀食，每朝只可以食麥皮，聽到都覺得辛苦。
早排有班環保團體拎住一啲用麥皮罐做嘅道具示威，黃成智話自己後來發覺裏面有麥皮，為咗唔想浪費，全部拎返晒屋企，依家啱晒喇，呢啲示威剩餘物資落晒佢肚。