中環出更：陳永棋拉頭馬開心過元宵
新正頭拉頭馬可謂意頭十足，如果首次開齋更加喜上加喜，邊個咁好彩？咪係全國政協常委陳永棋囉！棋哥嘅愛駒「精密紡」自○九年出賽以來，一直未贏過頭馬，直到尋晚終於守得雲開，喺快活谷夜賽以大熱門姿態奪冠，贏得三十六萬多元冠軍馬獎金之餘，佢仲買咗三千元獨贏及位置，再贏多一萬多元獎金，相信係今日元宵佳節最好嘅禮物。
備課講解國情
棋哥尋晚只係一個人入場拉頭馬，但依然好高興話會返屋企同太太食飯慶祝，度過一個開心嘅中國情人節。最近一班港區全國人大、政協準備喺三月落區去中學講解國情，有份參加嘅友好協進會會長棋哥坦言，為免被學生嘅問題考起，佢都要積極溫書，相信屆時能夠應付，至於國情內容，佢就話會交晒畀計劃嘅負責人、前教統局局長李國章處理喎！