中環出更：蔡加讚汪圓圓戀情曝光
步入兔年，「玩具大王」蔡志明喜事一單接一單，繼長女蔡加敏生咗一對老虎仔之後，今日元宵佳節，孻仔蔡加讚(Karson)亦宣布人月兩團圓，尋日畀卓妮直擊佢同模特兒兼演員女友汪圓圓十指緊扣，喺中環ifc拍拖。不過Karson有啲忐忑，事關佢喺嚟緊星期日先至帶女友首次見爸爸。
集勤力謙虛於一身嘅上進青年Karson，一直被認為係鑽石筍盤，戀情向來受各方關注，不過大家以後唔使再估估吓，事關尋日卓妮喺ifc行街，見到佢同「宇宙最強」嘅甄子丹姨仔汪圓圓十指緊扣行街街。
拍拖未滿月
Karson同圓圓識咗兩個月，不過正式拍拖就仲未滿月，因為剛萌芽，佢就陪咗屋企人去澳洲過年，一去七、八日，Karson直言當時人在澳洲心在港，除咗掛住家姐剛出世嘅孖B之外，亦掛住圓圓。
尋日Karson六點幾一收工，即刻同女友去拍拖，齊齊行ifc，一齊去買Le Gouter Bernardaud法式甜品，圓圓仲陪鍾意影相嘅加讚去Leica相機舖行咗個圈添。
Karson話，佢同圓圓經朋友介紹認識，最初大家都唔知對方係咩背景，只係愈傾愈啱傾，慢慢就擦出愛的火花。
蔡太讚純品
Karson喺兩人剛開始時就將女友介紹畀媽咪認識，蔡太大讚圓圓夠純品，至於圓圓嘅姐姐汪詩詩亦對加讚大有好感，令呢段感情發展得更順利。
之不過咁，事業心重嘅Karson，拍拖都一定要以工作為先，嚟緊繼續要忙玩具廠，仲要同姐姐加怡搞好新買返嚟嘅喜運佳鐘錶集團，工作排得密密麻麻。內地依家鬧工人荒，但係Karson話好彩年假之後，八、九成嘅工人都已經回廠復工，睇嚟圓圓腳頭都唔錯喎！