鬍鬚曾剛愎自用，無視來自社會坊間的聲音——還富於民！心水清嘅都記得過去兩年民生未算太艱難，政府都慷慨派糖；今年則形勢有別：儲備新高達六千億。有經濟學者指出，政府只需有相等於九至十八個月經常開支的財政儲備便足夠，換言之，只要有三至四千億儲備足矣！
明明係「官富民窮」，又話與事實不符，挑動官民矛盾。「官富民窮」彰彰明甚，高官高高在上，個個月薪動輒幾十萬，年薪閒閒地都二、三百萬，根本不知民間疾苦，像勞工及福利局局長張建宗話，「兩人賺最低工資不算窮」。兩人以最低工資二十八元日做八小時，每月二十六天計，即收入一萬一千六百四十八元，再扣除每月強積金供款，兩人收入只一萬一千一百多元，那已不符申領交通津貼（新計劃下二人入息上限一萬元），咁明顯嘅對比，如此這般刻薄的政策，仲話唔係「官富民窮」，死撐與事實不符。
明明係高官廢噏唔經大腦，一個人生活在樓價高踞不下、百物騰貴、公共交通加完又加下，竟然夠膽死話五千八百多元收入唔算貧窮？政府所謂「民心我心」，根本是狼心！鬍鬚曾一味批評那些叫政府善用儲備嘅學者係「不負責任」，查實最不負責任嘅就係佢自己，明明心胸狹窄卻死口唔認。
○八年諾貝爾經濟學獎得主克魯格曼，因他信奉凱恩斯主義，經常否定市場機制的作用，佢認為「信政府，得繁榮」，結果惹來信奉自由市場者洪水般的攻擊。堂堂大師都要被大眾喝倒采，鬍鬚曾明明是「失職的守財奴」，還扮甚麼「救世主」！