政情：李立偉組隊打造西九M+
群龍無首嘅西九文化區管理局團隊，尋日聚首一堂。新上任嘅M+行政總監李立偉雖然係瑞典人，但初步睇嚟都幾適應喺香港生活，不過尋日佢全程坐定定喺張櫈度，原來喺農曆新年前隻腳拗柴所致。前行政總裁謝卓飛離職都係因病之故，希望佢哋兔年可以吐氣揚眉啦！
謝卓飛疑似不堪壓力走人，履新一個月嘅李立偉話，佢享受壓力，亦明白大家對西九抱好大期望，所以有晒準備咁話。至於整親隻腳，純粹係前排喺街度跣親啫，兩個禮拜左右就會無事。
身負發展M+重任嘅李立偉打算成立有十一位策展人嘅十五人小組，即使依家未有場地，佢都好自信咁話以前試過發展無建築物嘅博物館，總之滿腹願景、計劃，實掂咁款。所謂前車可鑑，西九走人唔係第一次，希望李立偉頂得住啦！
料下月公布中選圖則
另外，西九第二階段諮詢結果會喺兩個禮拜內出台，預計下個月公布中選嘅概念圖則，今年八、九月進行埋第三階段諮詢，二○一二至一三年就可以動工。