政情：范國威度iPhone程式撲水
今年係選舉年，各大小政團都要出盡力籌款搞選舉。啱啱由民主黨分裂出嚟嘅新民主同盟尋日同傳媒團拜時，自爆佢哋早前喺年宵攤檔，埋單計算只賺得幾千蚊，同其他黨派嘅動輒數萬以至數十萬元，真係差天共地，惟有努力諗計四出撲水。
新同盟輪任召集人、西貢區議員范國威（Gary）就已經度定籌款大計，包括食住由佢設計嘅「普選鳳凰」概念，再設計一系列普選紀念品，喺七一遊行前再次吸水，又計劃喺社交網站facebook搞籌款活動，目標係過埋區選可以有錢剩租番個會址。
Gary仲睇中潮物iPhone嘅用家，打算創先河設計個專屬應用程式嚟籌錢。佢話依家唔少人對網上捐錢仍然有保留，但用開iPhone嘅人就冇呢個心理障礙，所以只要概念清晰，相信可以聚沙成塔。呢個概念雖然唔錯，不過唔少iPhone用家一直淨係用免費程式，如果靠佢嚟籌錢，唔知幾耐先至夠呢？