政情：怪醫嫌立會座位狹窄
立法會議員平時開會經常「蛇開」去立會前廳休息，雖然大部分都趕得切返去投票，不過唔見影始終令市民有不良觀感。「五散人」之一嘅立法會醫學界代表「怪醫」梁家騮尋日向傳媒大聲呼冤，話會議廳內嘅座位設計唔符合人體力學，坐得耐對膝頭唔好，所以閒時要出去行吓！
怪醫話依家議事廳嘅座位實在太窄，坐喺度冇位畀佢伸直對腳，企起身張櫈又頂住企唔直個人，所以坐個幾鐘已經令佢感覺好辛苦，如果平時星期三開大會，要由朝早十一點坐到夜晚的話，對膝頭關節會造成好大壓力，所以為健康着想，應該要出去行吓先得。
但怪醫強調，佢有經常留意電視直播，跟進住會議進展，絕對唔係蛇王唔做嘢喎！
怪醫仲話之前向秘書處反映過，希望畀議員帶自己嘅櫈入會議廳，不過秘書處怕唔齊整而拒絕。立法會今年暑假就會搬去添馬艦新大樓，到時地方大啲，座位亦唔會有怪醫所講嘅問題，咁唔知到時係咪真係會齊人啲開會呢？