政情：陳繁昌促鬍鬚曾科水
農曆新年一到，八間大學輪住搞春茗同各界拜年，今年打頭陣嘅就有科技大學，校長陳繁昌尋日帶頭叫財爺曾俊華喺財政預算案度「科水」，畀多啲資源高等教育界，特別係要再撥錢成立配對基金，等大學叫人捐錢都容易啲，話晒政府會一對一配對，對捐款人同大學嚟講都好吸引。
陳繁昌講開就順便同政府呻，話過去幾年，政府好落力搞私立大學，又成立基金、又撥地起校舍咁，相反對傳統公營大學就好似無咩聲氣，佢話做研究同創新科技，始終係公營大學嘅強項。
陳校長仲話，既然庫房水浸，政府大把錢，當然要投資落教育度，提升香港整體嘅知識水平。
至於科大，今年係大學創校廿周年，嚟緊會有一連串嘅慶祝活動，由校長同四位副校長組成G5、即係Group of Five，帶領科大迎更多廿年，當中新開設嘅大學拓展副校長職位，由前總商會行政總裁翁以登擔任，翁副校長話，大學最緊要就係講定位，未來科大會更加着重科研嘅角色，訓練學生嘅研究思維喎。