中環出更：愛駒跑出黃英豪人日響頭炮
農曆年初七「人日」，代表人人都生日，金至尊主席黃英豪都意外收到一份大禮物，就係佢有份嘅團體馬「至尊飛飛」出賽以來首次奪冠，尋晚喺跑馬地出賽贏頭馬，贏得四十八萬多元獎金。全國青聯常委吳傑莊就打住紅呔入場為黃英豪打氣，「至尊飛飛」跑出後，黃英豪拉埋吳傑莊落場拉頭馬兼開香檳，好開心話新正頭拉頭馬好意頭，為兔年打響頭炮。
陳健波行山催運
尋晚馬場好熱鬧，卓妮仲見到工業總會副主席劉展灝、財經事務及庫務局局長陳家強夫婦與副局長梁鳳儀，佢哋不約而同包廂房搞春茗宴請好友。陳家強夫婦個宴會，嘉賓就包括保險界立法會議員陳健波夫婦。健波話，今個農曆新年無外遊，因為喺外地讀書嘅囝囝回港過年，於是一家人四圍去拜年，有日仲抽時間去北區鹿頸行山四小時，行番個大運。
講到兔年願望，陳家強祝港人新年快樂，本港經濟有良好發展。健波就希望政府搞好本港經濟之餘，亦望樓市降溫，令市民安居樂業。