中環出更：鯊魚骨燉湯肥亨百喝不厭
中策集團主席馬時亨係社交圈出名嘅「食神」，食遍天下美食，但有一處地方，幫襯十多年，依然百吃不厭，佢就係位於灣仔萬麗海景酒店嘅滿福樓。肥亨每次到訪，例必柯打火候十足嘅鯊魚骨花膠燉菜湯。湯底以老雞、火腿及鯊魚骨熬製而成，配上養顏花膠，濃郁鮮甜。滿福樓蜜汁叉燒遠近馳名，肥亨嫌未夠喉，叫多一碟蜜汁燒雞肝，師傅精選上等雞肝，塗上蜜汁烤製而成，每日限量供應約三碟，貴精不貴多。
滿福樓炮製粵菜夠正宗，吸引唔少富豪光臨。身為大老闆嘅新世界集團主席彤叔鄭裕彤與公子鄭家純都係常客。
彤叔父子愛家常小菜
彤叔少吃鮑參翅肚，最愛家常小菜，其中三色蒸水蛋、砵酒煮魚雲、炒斑球及蜜汁叉燒等，係兩父子至愛。
肥亨愛以食會友，積累唔少名人「飯腳」。佢笑言喺商界工作多年，與多位城中富豪係老友，除彤叔外，同恒基主席李兆基等名人都好傾得埋。