中環出更：霍震寰預告兔年家有囍事
跳水公主郭晶晶去年突然宣布退役，等做兔年新娘，但呢位未來霍家新抱好口密，同男友霍啟剛夾晒嘴形，隻字不提婚事。不過啟剛嘅阿叔、中華總商會榮譽會長霍震寰尋日就露口風，預告今年有家族成員結婚，睇嚟啟剛同晶晶，好快拉埋天窗噃。
究竟霍家係咪就快有人辦喜事？喺尋日一個新春團拜活動上，卓妮問起霍震寰，佢鬼馬地笑一笑話：「未噃，你問番佢（啟剛）爸爸喇。」但霍生神情相當高興，預告佢表哥嘅公子今年將會結婚，總之都係家有喜事喇。
關心賭王爭產風波
睇見後輩雙雙成親，霍生笑言恨飲新抱茶。佢公子啟文早前曾密會賭王三房女兒何超雲，齊歎法國餐，但感情曇花一現。唔知啟文有新目標未？霍生就保持神秘，話啟文今年唔會結婚喎。霍家同賭王何鴻燊家族關係千絲萬縷，賭王陷入世紀爭產風波，霍生都送上關心，但佢慨嘆一句：「清官難審家庭事。」相信賭王會識得點處理喎。
Ann蔣keep fit過七不食
卓妮轉頭撞見工業家蔣震女兒蔣麗芸（Ann），見佢瘦身成功，原來Ann蔣奉行「過七不食」，即係夜晚七點後唔食嘢，早餐就食麥片，日子有功，身形Fit晒。新年期間，Ann蔣與老公及三妹麗萍同遊長隆野生動物園，初嘗餵長頸鹿食嘢滋味，親親大自然，皮膚都靚啲。
喺團拜活動上，有唔少港區人大代表撐場，包括雷添良（Tim）、廖長江、馬浩輝及羅范椒芬。講起新年投資大計，各有心得。Tim雷自爆投資掣肘多，事關佢係羅兵咸永道會計師事務所稅務合夥人，唔少上市公司都係佢哋客仔，為免畀人話有利益輸送，好多股票都唔掂得，惟有投資人民幣保值。身旁嘅廖長江都投人仔一票，佢笑言係穩陣派，炒股唔啱佢，人仔風險低，最划算。