政情：翁以登做副校專責「吸水」
前香港總商會行政總裁翁以登（Eden）去年底投身科大，出任新增設嘅副校長，負責大學拓展工作，返咗工幾個月，Eden趁新春四圍「派片」兼打招呼，夠晒主動。
卓妮日前收到Eden嘅「拜年信」，內附一張新卡片。佢喺信中介紹自己嘅往績，包括幾年前曾經任職星巴克副總裁，將飲咖啡嘅文化帶進內地。
Eden突然棄商從「教」，商界口痕友都嘖嘖稱奇。諗真啲，又唔難理解噃，事關Eden份新工要專責籌款。如今幾間大學都各出奇謀「吸水」，搵猛人捐錢係「指定動作」，但如果人面唔夠，牙力弱啲，想搵人「關照」都難。Eden喺政商界人脈廣，又曾擔任海洋公園、醫管局及港府策略發展委員會成員等公職，難怪獲科大羅致。