升值至五位數字
雞相信下年唔會好似○五年黨友李永達（高達）咁，連提名人都搵唔夠，仲自爆當年高達挑戰失敗後，雞請佢上屋企食飯，開咗支九六年嘅Lafite安慰佢，點知事後發現支酒原來升值咗好多倍，當堂後悔自己太豪氣。
雞尋日同傳媒透露，支酒當年喺英國買返嚟，折實港紙三千幾蚊，點知同高達分享咗支酒後，至發現同一年份嘅Lafite已經升值至五位數字，計落都不知幾肉痛。
至於年底嘅區議會選舉，雞話會派百三人參選，希望攞到六十五席，如果達標，就證明民主黨有能力派兩張名單競逐超級區會議席，所以結果好具指向性。為應付其他人狙擊，民主黨仲會開班訓練候選人點應對謾罵，希望將狙擊嘅影響減到最低。