港府遲鈍弱智　救人一味靠黐

大家應該食過團年飯啦，今日當然喜氣洋洋去拜年，利是得開開心心，派利是派得高高興興。之不過咁喎，有部分市民幾乎趕唔切返香港團年，事關地球另一邊發生咗驚天動地嘅「出埃及記」。

樂蜀樂蜀，樂不思蜀，本來係一個好得不能再好嘅中文譯名，完全脗合旅遊勝地嘅誘人氛圍。不過可惜吖，埃及人民力量策動反政府示威，連日不斷有人要求執政長達三十年嘅獨裁總統穆巴拉克落台，搞到全國亂七八糟，樂蜀忽然之間危城告急，連累大批香港遊客滯留當地。

唉，睇番特區政府嘅遲鈍反應同弱智表現，簡直又係眼火爆。保安局遲遲唔發出黑色外遊警示，搞到個個手忙腳亂唔知點算好，尤其係各大旅行社，進退維谷陷於兩難局面。好嘞，等到埃及局勢一發不可收拾，示威者號召整一鋪「憤怒民眾百萬行」，保安局終於發出黑色外遊警示，你以為梗係會派出包機救人㗎啦。哈，整鬼佢吖，居然冇包機喎，淨係識得一味靠黐，要求中央出手「順便」接濟港人同胞。

講到呢度，功夫茶真係覺得有少少無地自容。莫講話全世界都派出包機拯救自己嘅國民「出埃及」，即使係經過戰爭蹂躪而變得滿目瘡痍嘅伊拉克，都不惜派出總統專機飛去接人，唯獨係繁榮富庶嘅特區政府袖手旁觀。

唔派包機不特止，一味靠黐都未算，保安局居然又諗埋啲縮骨數，副局長黎棟國話喎，專機費用不應由公帑支付，應循用者自付原則處理，所以當局會同旅議會直接跟進機票費用事宜。

喂，十萬火急救人要緊吖嘛，點解咁婆婆媽媽？點解咁斤斤計較？難怪立法會議員王國興怒轟政府犯咗三宗罪，一錯在遲發黑色外遊警示，二錯在冇派包機接人，三錯在講錢傷感情。王議員問得好：「唔通消防車出動救火救人都要收錢先！」

一次係咁，兩次係咁，餐餐都係咁，功夫茶真係唔明，保安局要到幾時先至可以吸取教訓？○八年泰國曼谷發生示威者佔領機場事件，大批香港人滯留當地，遲遲冇派包機救人嘅保安局已經被輿論剷到上天花板㗎啦，今次埃及面對差不多嘅問題，咁都唔識得見一事長一智，你話特區政府一眾官僚唔係弱智都冇人信啦！

至於引發埃及示威嘅突尼斯，講起嚟仲滑稽。正當突尼斯政局動盪不安之際，保安局徹頭徹尾無動於衷，完全冇發出任何外遊警示，莫講話唔係黑色，連紅色同黃色都冇，原因竟然係「突尼斯不在警示制度覆蓋範圍以內」。功夫茶絕對有理由相信，特區政府一眾官僚嚴重缺乏地理常識，一來未必聽過突尼斯，二來未必知道地球係圓嘅。

不幸中之大幸就係，滯留樂蜀嘅香港人終於靠阿爺嘅包機安全回家，趕得切食團年飯送虎迎兔。

計功夫茶話齋，保安局如果唔徹底檢討改善警示同救人機制，下次未必咁好彩有阿爺打救㗎咋！