政情：陳巧文鬧市扮兔 性感反皮草
嚟緊幾日天氣又會凍番，唔知女士們會唔會出動皮草大褸禦寒，下星期去拜年時爭妍鬥麗一番？兔年出世嘅社運人士陳巧文，尋日化身為比堅尼兔女郎，手持標語穿梭銅鑼灣鬧市，呼籲大家捨棄皮草，將動物皮毛還番畀佢哋嘅主人。天寒地凍着咁少上街，陳巧文都話，咁多人望住當然覺得尷尬啦，但為動物都無計喎。
陳巧文同三位社運朋友，應善待動物組織嘅邀請寬衣解帶，換上白色比堅尼上衣、超短熱褲加一對兔耳朵喺銅鑼灣示威，立即成為銅鑼灣嘅亮點，唔少途人經過都嘖嘖稱奇，紛紛拎出手機影相。
幾凍都唔及兔仔慘
首次為愛護動物組織獻身嘅陳巧文話，以後都唔會着皮造嘅鞋！佢希望可以喚醒大家減少塗炭無辜小動物生命，事關佢咁樣企喺街度即使幾凍，都及唔上可愛嘅兔仔咁慘。