政情：政改立法開快車避兩會
政改本地立法草案審議得如火如荼，喺草案委員會兼民建聯主席譚耀宗督促下，委員會尋日已極速完成逐條審議嘅工作，嚟緊新年後更會開快車趕工，預計最快可以喺三月二日恢復二讀。據了解，譚耀宗所以懶理部分議員反對，咁心急想ＫＯ條草案，原來係怕會議一拖，撞正三月三日起開幕嘅人大、政協「兩會」，到時好多身兼人大代表及政協委員嘅建制派議員就要被迫京港兩邊飛，蝕機票錢兼且蝕埋時間。
譚耀宗尋日喺政改草案委員會上特地向同僚預告，話過年後委員會將要加開會議，以便三月二日可如期恢復草案二讀，叮囑同僚預留時間，做足心理準備。
此言一出，有白鴿黨議員即時詐型，話當日除咗要審議停車熄匙嘅草案，仲有最低工資兩項公告及帳目委員會針對直資學校嘅報告要處理，萬一再將本地立法塞埋入議程內，分分鐘玩成三至四日，建議譚耀宗唔好咁心急。儘管如此，譚耀宗仍然企硬，僅話會喺本周六同港府嗰邊再商討。
留時間做後續工作
不過，譚耀宗尋日否認自己敦促委員會開快車係為咗避「兩會」，只係話草案審議工作已經做得七七八八，相信過年後開多幾次會、搞掂埋啲修訂，要喺三月二日恢復二讀並非難事，仲話早啲搞掂佢，可以留番多啲時間做後續工作喎。
不過佢亦不得不承認，萬一再係咁拖落去，就難為了班「雙料議員」：「如果三月二日審議，我哋最多遲啲先上北京；之但係如果一延期，我哋就要兩邊走啦，都幾麻煩㗎！」
譚耀宗咁抵得諗，幫班建制派議員「爭取權益」，固然可令佢哋唔使兩邊飛。不過換嚟嘅，就係二月停不了嘅會議，呢啲就係趕工嘅代價嘞！