中環出更：田二少「捱窮」履冰冇難度
人稱「田二少」嘅新民黨副主席田北辰，最近放下身段拍真人騷，轉行做清潔工，既要倒垃圾，又要捱麵包兼住籠屋，實實在在體驗三日兩夜窮人生活。咁辛苦都捱過，難怪尋日佢出席長者家慈善基金《襪襪送》「冰上行開幕禮」活動時，為體驗窮老人冬天無襪着之苦，即席除襪再赤腳行冰，全程笑笑口無痛苦。
今勻做窮人嘅二少，完全體驗捉襟見肘之苦，事關佢每日得五十蚊使費，搭車用咗二十蚊，每日得返三十蚊開餐，真係唔夠食，所以佢本嚟打算由千三蚊嘅籠屋搬去間租金七百蚊嘅梗房，點知嗰度無電無熱水，仲要與曱甴同眠，點住啫？！惟有食慳啲囉，每日啃麵包同飲水就算。
踎低執樹葉險折腰
二少話掃樹葉係最難，要踎喺度執，仲有人廿四小時
實佢，無得偷懶，有次有人丟垃圾時問佢可唔可以直接丟落佢部車度，即時開心到佢要拱手作揖咁滯。見佢喺個預告片度大嗌條腰差啲斷，睇怕田太見到心痛死。不過二少話佢無打番屋企同老婆訴苦，事關攰到無心機打，每日一撻落床就瞓到不省人事。
卓妮