中環出更：細心張華峰豪買頸巾送禮
下周四（三日）就係大年初一，好多人趕住呢幾日辦年貨，恒豐證券董事總經理張華峰都唔例外，大前日（廿五日）下晝喺中環置地廣場行街Shopping，傍晚五時再約朋友到Cafe Landmark歎茶傾偈，一件公司三文治兩份食，直到七時埋單離開。卓妮見張華峰手上挽住兩個大紙袋，其中一個係名店Burberry嘅紙袋，原來係送畀生意朋友嘅新年禮物。
利是一般$50 熟人$100
張華峰好大手筆，一次過買咗五條Burberry新款頸巾，有灰、藍、黑三色，每條三千幾元，盛惠一萬五千幾元。張華峰話，估計農曆新年天氣繼續寒冷，送頸巾畀朋友可以即時用來保暖，配襯長身大褸更加好睇又有型。所以話，男人一樣可以好細心。Burberry嘅頸巾一向廣受歡迎，Cashmere質料夠柔軟又保暖，難怪近年價格有升無跌。
張華峰送禮都咁闊綽，封利是睇怕都唔會手軟，尋日佢已經拿住一大袋利是封，準備攞番屋企封利是，咁一封幾錢呢？佢話酒樓侍應同大廈管理員一般封五十元，熟人就封一百元，親友當然會大封啲啦，之但係一年要封幾多錢利是，佢就話唔方便透露喎。張華峰喺金融證券業識咁多人，本身又係全國政協委員，一樣喺政界打滾，睇怕每年嘅利是錢都幾襟計。
早前張華峰做大好友睇好港股後市，預測農曆新年後會穩步升到三萬一千點，可惜近日港股不升反跌，二萬三千八百點都守唔住。張華峰分析，主要因為本港嘅內地資金回流內地，加上中央調高存備金率，先至搞成咁。佢提醒大家，投資產品唔會長期上升，總有機會跌番落去，所以投資小心為上。其實投資幾時都要謹慎，小心駛得萬年船嘛！
卓妮