政情：毓民大舊拒公開退黨人數
社民連創黨主席黃毓民同黨友陳偉業，上周日喺集思會上高調退黨，仲呼籲支持者退黨跟佢哋走。當日兩人都聲言會喺尋日嘅退黨記者會上，清楚交代退黨人數，但佢哋尋日卻以未收齊晒退黨表格為由，唔肯公開數字。
毓民同大舊尋日舉行記者會，故意選擇喺中環遮打花園舉行，動員支持者撐場，向外宣揚實力。兩人喺會上宣讀退黨宣言，但對於未來嘅選舉部署、前黨友長毛梁國雄嘅去留，以至實際嘅退黨數字，兩人卻封口不提；面對記者較為尖銳嘅提問，更表現得相當火爆。
同為創黨委員之一嘅李偉儀就話，估計至今有二百多人退黨，其中二十多人為海外黨員，但現任主席陶君行就話，截至尋晚只確定有十八人退黨。另外，疑似任亮憲強姦案嘅女事主亦對毓民同阿陶反枱有感，喺網誌上話：「變，是永恒不變的，感情如是，政治如是。」總之就繼續抽水。