政情：肥亨加入合唱團踩政府
香港經濟金融體系自由度享譽國際，但卻面臨種種挑戰，可惜政府掩耳閉目當無事。兩年前因病辭官嘅中策集團主席馬時亨就睇唔過眼，加入「退休高官合唱團」行列，尋日出席浸會大學僱主午餐會演講時，提出香港正面臨三大挑戰，包括生活及營商環境差，又缺乏人才，加上甲級寫字樓租金昂貴及「官商勾結」惡名，令外來投資者望而卻步，作為特區政府，當然係責無旁貸。
肥亨指出，香港過去十年受惠於祖國發展，成為內地企業走向國際嘅重要跳板，可惜香港鄰近城市急速發展，令香港面臨巨大挑戰。首項挑戰係生活環境。肥亨話，外資公司對空氣質素及教育配套要求好高，偏偏香港空氣質素差，國際學校學位又不足，呢兩方面都有好大進步空間。佢用咗一個好生動嘅例子比喻話，喺沙特阿拉伯地下掘個窿，可能會有黑色石油流出，喺香港地下掘個窿都會有黑色液體流出，不過係污水啫！肥亨咁講，矛頭直指環境局局長邱騰華及教育局局長孫明揚。
「官商勾結」惡名嚇走外資
第二項挑戰輪到營商環境。肥亨話曾經聽過好多外國企業反映，批評香港甲級寫字樓租金高昂，被迫轉到其他城市發展，加上商人經常被指「官商勾結」，影響跨國企業來港設立亞洲區總部。
香港面臨嘅最後一項挑戰，就係缺乏人才。肥亨話，香港成功全靠人才，但現今年輕人競爭激烈，所以要不斷自我增值，既要有努力向上、認真學習嘅態度，還要有國際視野、肯拚搏及永不言敗精神，簡言之，「世界係無嘢由天跌落來嘅」，肯搏就一定有機會。不過佢都補番句，寄語僱主要重視人才培訓，視員工為資產。
講講吓，肥亨話鋒一轉，矛頭直指香港最大嘅僱主——特區政府，批評政府無法吸納社會精英投身政務官（ＡＯ）行列。肥亨坦言，現時做ＡＯ得唔到社會尊重，經常被議員鬧狗官，又無長俸，連房屋津貼都大不如前，加上退休再就業都諸多限制，唔單止好難請到精英，更憂慮公務員隊伍嘅離心影響管治。
估唔到肥亨唱唱吓聖詩，昇華到加入「退休高官合唱團」批評政府，與前特首辦主任林煥光、前公務員事務局局長王永平及前天文台台長林超英等前高官一齊，同政府打對台，只怪無能政府百事哀。