中環出更：重遇舊同窗 鄺其志High爆
前港交所行政總裁鄺其志轉戰商界後深居簡出，尋日中午卓妮喺香港仔一間海鮮餐廳撞到呢位稀客，原來佢嚟參加皇仁書院嘅舊同學聚會。當中有啲同學有成四十年未見，相見一刻激動相擁，情緒high爆，鄺其志仲飲到滿面通紅，開心到難以形容。
把酒話當年
尋日十二點幾，卓妮見到鄺其志一個人坐喺餐廳度等人，於是上前同佢打招呼。佢好客氣咁話，今次係皇仁書院嘅舊同學聚會，有啲同學已經四十年冇見，難怪佢咁早嚟到，梗係好期待喇！後來愈嚟愈多頭髮半白嘅皇仁仔陸續嚟到，大家攬頭攬頸好激動，成班人把酒話當年，旁人都感受到佢哋high爆嘅心情。
間海鮮餐廳裝修毫不起眼，但勝在以新鮮魚獲炮製一道道傳統美食，所以好多政商名人嚟幫襯，鄺其志話佢都食咗好多年。
臨散場之前，眾人嚟個大合照，青葱歲月雖已遠去，但鏡頭前個個笑容真摯，彷彿又回到年少輕狂嘅日子。
卓妮