政情：唐唐無視自閉症患者訴求

政務司司長「唐唐」唐英年出名口沒遮攔兼輕佻，不過尋日佢出席關愛基金公眾諮詢會時，仲暴露埋自己反應差。話說有個患自閉症嘅年輕人，投訴政府冇投放資源畀自閉症患者，希望當局改善。不過唐唐竟然話，呢位市民口齒伶俐，一啲都唔似自閉，仲祝佢快啲康復，完全冇回應佢嘅提問。不過嗰位年輕人就即時頂咗佢一句：「自閉症係無得醫嘅。」自閉症係咪可以治愈，每個個案唔同，但唐唐畀個年輕人窒完，竟然當聽唔到，就似乎有啲掩耳盜鈴。