政情：黃派開記招數臭阿陶
黨內糾紛亂到令人頭暈嘅社民連到底會唔會落得分裂下場，要等到星期日非當權者集思會先有答案。不過，創黨主席黃毓民同現任主席陶君行兩派之爭就愈演愈烈，最近仲由人網及討論區舌戰、facebook圍攻政敵，升級到登報互插。
黃派嘅李偉儀同虞瑋倩尋日就以「一○憲章」嘅名義，搞咗超過兩個鐘嘅記者會，力數陶君行不是，加埋陳偉業愛將麥業成尋日宣布退出社民連行委，睇嚟大規模退黨潮已漸見雛形。
社民連自「五區公投」前後出現分裂，幾個月來經常互揭瘡疤，尋日嘅記者會全程喺網台直播，李偉儀做兩個鐘就鬧足兩個鐘，由「公投」、新花都事件、公司註冊糾紛到近日嘅代道歉聲明，由頭再鬧多次，驚死大家唔知佢要同陶派劃清界線。
及後佢哋仲不停呼籲盟友踴躍出席星期日嘅非當權者集思會，據悉到時連捲入強姦及非禮案嘅「維園阿哥」任亮憲都會出席，實行再度集結月前嘅「倒閣」力量，等大家風光退場。到時陶派點反擊呢，大家可拭目以待。