政情：黃灝玄履新做旁聽生
剛調任商務及經濟發展局（工商及旅遊科）常任秘書長嘅黃灝玄，尋日首日上班，適逢局長劉吳惠蘭率領副局長蘇錦樑等一眾轄下高官與傳媒見面，新官上任嘅黃灝玄都列席做旁聽生，個半小時嘅聚會只聽不講，間中眼仔碌碌望吓天花，好輕鬆。
據聞黃灝玄上任前已多次到商務及經濟發展局「備課」，對處理範疇已有一定認識；加上佢喺政務官生涯中，先後派駐過日內瓦及布魯塞爾經濟貿易辦事處，現時重操工商事務，相信好快可以上手，絕對唔係新丁一名。
黃灝玄接替舊年年底退休嘅蔡瑩璧，出任商務及經濟發展局常秘，調任前係公務員事務局常秘，但喺立法會調查梁展文事件聆訊中，被批評處理梁展文加入新世界中國申請時失職，佢喺聆訊中承認「做得不夠細緻」，「看得不夠透澈」。今次換吓新環境，未嘗唔係一件好事。