政情：肥平籲捐利是助內地貧童
香港人豐衣足食，莫講話缺糧，連制水都少見。不過遠在甘肅嘅小朋友，就飽受沙漠化困擾，三餐不繼。由前民政事務局局長何志平等人組成嘅「寸心行動」，尋日發起捐利是行動，呼籲全港中小學生，新年後捐出一封或以上利是，送暖到內地。教育局副局長陳維安（Kenneth）帶頭做好榜樣，教囝囝善用利是。
陳維安封利是冇上限
Kenneth教仔有一套，舊年鼓勵大仔去桂林陽朔做義工，了解民間疾苦。肥平發起嘅「寸心行動」，佢都好支持，鼓勵學生將部分利是儲起之餘，捐助內地貧苦大眾，仲教佢囝囝咁樣善用利是。講起封利是，Kenneth唔使太太操心，由佢一手包辦，仲自爆封利是冇上限。
「寸心行動」主要為中國受沙漠化或荒漠化影響嘅貧瘠地區籌款，用作綠化環境及扶貧。不過肥平話，全世界最沙漠化嘅地區，係香港人嘅愛國心。佢話中國幅員廣闊，香港學生捐出嘅利是錢，只係杯水車薪，意義大於實際，事關香港回歸十三年，好多人依然未有愛國意識，所以希望透過今次活動，灌溉香港年輕一代沙漠化咗嘅愛國心。