政情：大輝落區送暖硬銷C18
廠商會立法會議員兼地區組織C18召集人林大輝最近手氣唔錯，佢啱啱以約三百萬港元買咗隻愛爾蘭馬，今個月廿六日就會抵港。
大輝好開心咁話，佢原本同賣方傾好價錢，點知臨尾賣方賣大包，畀咗個大折扣佢，最終比原價平咗一成半賣畀佢，原來當地經濟未復甦，益咗大輝執平貨。大輝話，隻馬仲未改名，不過佢啲馬都係叫做乜乜「奇妙」㗎啦！
尋日氣溫得嗰九度，但大輝無懼寒風落區大搞親民活動，同C18成員北區區議員余智成、溫和達喺上水北區公園大派愛心曲奇、玩具同埋紙巾，街坊有得玩有得食。無論係曲奇、紙巾定係大輝嘅頸巾，全部印有C18嘜頭，非常硬銷。
大輝笑稱，條頸巾係樣本，佢先戴為快，遲啲會派畀老人家。至於心形嘅愛心曲奇，係C18成員百分百手工自製，僅此一家，別無分號。難怪每一塊曲奇嘅造型都睇得出有Hand Made嘅痕迹，大輝亦都唔介意人哋一啖食咗C18落肚。