中環出更：Vivienne Tam演繹自家新作
寒風未退，春裝尋日率先喺馬場上演。著名時裝設計師Vivienne Tam譚燕玉尋日罕有地亮相沙田馬場，佢穿上一身黑皮褸，外表密密實實。原來內有乾坤，皮褸下係Vivienne最新設計嘅紫色春裝，令人有種暖意盎然嘅感覺。
專心喺紐約發展嘅Vivienne再現香江，風采依然。Vivienne身上所演繹嘅，當然對來季潮流有所啟示。Vivienne今季大玩中國剪紙元素，身上呢條裙，遠睇似片片紫色花瓣，睇真啲，原來係由動物剪紙圖案組成，既飄逸又活潑，新作仲剛喺紐約展出添。
疑似男友現身
難得返港，Vivienne話會睇埋貿易發展局舉辦嘅時裝騷先走。美國早前刮起大風雪，相比之下，Vivienne覺得香港好溫暖。卓妮留意到，向來獨來獨往嘅佢，尋日身邊多咗位中年外籍男伴，係咪男友？Vivienne笑而不答，從伊人嘅甜絲絲笑容，大家自己估吓喇。