政情：高官議員齊出洋相
特首答問大會內容有冇料到，一睇班官員議員嘅眾生相就知道。向來出席會議都「難逃一睡」嘅教育局局長孫明揚，尋日出席會議時貫徹作風，懶理世事，專注會周公。社民連長毛梁國雄就繼續向特首「掟蕉」洩憤，仲唔小心整跌同僚部iPad，搞到人哋忍唔住爆出一句：「搞錯呀！」
民主黨甘乃威同商務及經濟發展局副局長蘇錦樑尋日喺答問大會上，由頭到尾都喺度手篤篤，睇真啲先知佢哋玩緊iPhone同iPad解悶，近日榮升做公民黨黨魁嘅梁家傑，就掛住上自己嘅facebook專頁睇留言。同樣敵不過「專注力大考驗」嘅，仲有瞓到成尊佛咁嘅孫公、工聯會潘佩璆同民建聯黃定光（象哥），其中象哥仲瞓得超冧，個頭一度貼近張枱，旁人都替佢擔心。
近日忙住反申亞嘅公民黨陳淑莊（Tanya），就喺會議上三度誤稱特首做「局長」，事後仲笑言自己「太掛住」民政事務局局長曾德成先會如此，搞到對方好鬼尷尬。