政情：陳智思望保留老舖
可持續發展基金近日資助民間團體推行油麻地舊區再造計劃，尋日啟動禮邀請咗可持續發展委員會主席陳智思（Bernard）及多位嘉賓出席，大家一齊行上海街參觀多間老店舖，行業包括裙褂、藥油、金舖、鏡框及文具舖等。
其中Bernard印象最深刻都係有逾八十年歷史嘅「鏡明畫框」，原來佢爸爸陳有慶嗰代已經開始幫襯。
Bernard參觀鏡舖期間，被陳老闆認出，話Bernard爸爸陳有慶及所屬社團都係佢哋鏡舖嘅熟客仔，長期幫襯訂造相架及鏡框，咁啱前日先至送完畫框去陳有慶間公司。Bernard話，今次親身探訪老店舖感覺好特別，亦覺得好有意義，希望呢啲舊式老舖唔會消失喎！
Bernard又話，原本諗住帶埋家人及小朋友去認識吓，但當知道有記者採訪，都係第日先參觀嘞。有關計劃由非牟利團體「文化葫蘆」推行，為期兩年，希望透過導賞團、工作坊、藝墟及講座等一系列文化活動，保育舊區文物及文化遺產，並營造可持續創意社區。