中環出更：梁智仁飛越重洋闖南極

梁校長唔怕凍，但此行舟車勞頓嘅挑戰唔少，事關佢哋要先去德國法蘭克福，然後轉機去阿根廷布宜諾斯艾利斯，再轉去最南邊嘅烏斯懷亞（Ushuala），跟住再坐多幾日船先可以去到南極，所以旅程頭尾雖然有十七日，但真正可以畀倒梁校長感受呢個無污染、無聲音兼景色特別嘅世外桃源嘅時間並唔係咁多。

不過難得有機會去，梁校長都好珍惜。新民黨嘅葉劉淑儀亦一樣唔怕凍，新年會去杭州賞雪。杭州唔一定落雪，要碰吓運氣喇。

陳振彬（Bunny）聖誕同兩個仔去北海道滑雪，太太去到咁遠，都一樣堅守一家之「煮」本分，除咗晚餐佢哋約朋友食之外，早午兩餐都煮足咁多日。所以喺農曆新年，Bunny要帶老婆去蘇梅島巡廠，陳太係呢間廠嘅開業大將軍，同班伙記熟晒，到時一定可以好好放假。Bunny仲話太太由未嫁到依家都係佢嘅財務總管，所以佢只係負責賺錢，太太負責管錢，兩個仔依家就負責使錢，一家人各司其職。

陳振彬料利率年內上調

Bunny專心搵錢，對於樓巿亦好留意，佢預測利率一年內會上調，快則今年年尾，慢則明年年初，事關好多地方嘅通脹升得好犀利，政府為避免惡性通脹出現，需要用加息手段去壓抑，所以加息一定會來，呼籲置業要考慮。

至於農曆新年照例會去歐洲滑雪嘅港交所主席夏佳理亦覺得樓巿喺政府出招後無大回落，證明巿場有需求，政府係打擊炒風，並唔係要壓樓價，如果想調整樓價，一定要喺供應上着手。

夏佳理年年冬天都去歐洲滑雪，今年都唔例外。	葉劉淑儀注意身形，寒天下都唔會食多啲保暖。	Bunny話囝囝去北海道旅遊時，撞到好多朋友。

卓妮