中環出更：蒙德揚借徐立之府邸開P
正所謂出外靠朋友，相識滿天下嘅信興集團副主席蒙德揚（David），踏入二○一一年，首先就要多謝老友港大校長徐立之幫咗佢一個大忙，借出校長府邸花園，如果唔係，信興搞咗幾十年嘅元旦Garden Party，今年分分鐘要泡湯冇得玩。
別墅搞Party遭人反對
David話佢哋呢個元旦Party已經搞咗幾十年，每年都會喺佢已故爸爸蒙民偉舂坎角嘅別墅搞，所以可以話係爸爸同成間公司嘅一個傳統，就算上年爸爸身體唔好，無出嚟一齊玩，但個Party都一樣繼續。今年蒙叔過咗身，David都好希望可以延續爸爸好客之道，但係估唔到中間出現咗啲阻滯，喺Party前十日，David先收到通知，話有人反對喺別墅開派對，嗰段時間係聖誕同新年旺季，可以容納到數百人嘅場地絕無僅有，咁點算好呢？咪就係好彩有朋友幫手囉！
全靠徐立之，場地搞掂咗，食物安排當然唔可以「豆泥」，David特登搵人喺日本運咗十公斤越光米過嚟，即場用電飯煲烹調，再配合埋蒙叔嘅獨門咖喱，食到個個lam lam脷，十公斤米話咁快就食晒。
卓妮