政情:曾偉雄被指「鷹派」抓晒頭

新任警隊一哥曾偉雄尋日正式履新,第一日「擔正」一哥就同傳媒會面,現身約十五分鐘,答咗六、七條問題。有人話佢係「鷹派」,言下之意話佢處事強硬又保守,不過佢就咁答:「唔係好清楚有啲人用呢個『鷹派』形容我,究竟係咩意思?」

警隊過往有旺角警署強姦等醜聞,要挽回市民信心唔易,一哥就話會繼續深化工作、實踐誠信及服務文化。佢又主動提及「火爆男」事件,話有個別市民將「不滿情緒帶到報案室」,用粗口鬧當值同事,但相信每位同袍都會做好自己嘅使命。

曾任民歌舞蹈學會秘書

至於有指警方處理中聯辦外示威運用過多警力,佢就辯護話,部署幾多警力要視乎行動性質等考慮,不能太過簡單用警力嚟定對錯。一哥尋日見完部門處長級人員同職方代表,稍後展開對外溝通。佢尋日一臉嚴肅,表現淡定,螺絲唔多,仲話係「帶住愉快心情上班」。

講到履歷,曾偉雄六四年入讀高主教書院小學部小一,七七年喺該書院預科畢業,係文科生,同屆同學有現任土木工程拓展署署長韓志強。唔講唔知,一哥高中時擔任過民歌與舞蹈學會秘書同中文學社財政職位,舊年都有返母校做畢業禮主禮嘉賓,唔知佢幾時施展吓歌藝同舞藝呢?高主教書院出唔少名人,民政事務局常秘楊立門同前公務員事務局局長王永平,都係高主教出品。

Money18新功能「18好路數」為你預測心水股票升跌機會率